Память 4 января — 22 декабря по старому стилю



Акафист святой великомученице Анастасии Узорешительнице

Anastasiya Rossiya Mernaya ikona vel knzh A Mihaylovni Rossiya 19v GE intro

  Кондак 1

Избранней угоднице Христовой всеблаженней великомученице Анастасии / похвальное пение приносим, / яко имущей многое дерзновение ко Господу / еже от всяких бед, скорбей и болезней свобождати верныя, / и с любовию взываем сице: / Радуйся, всеблаженная великомученице Анастасие, // узников святая посетительнице и молитвеннице о душах наших.

Икос 1

Ангелом уподобилася еси разумом чистым, познавши Того, иже есть всего вопием ти:
Радуйся, возлюбившая веру Христову;
Радуйся, соблюдшая чистоту девства твоего;
Радуйся, всегда невидимо охраняемая Ангелами;
Радуйся, чистотою твоею к Богу приблизившаяся;
Радуйся, всеблаженная великомученице Анастасие, узников святая посетительнице и молитвеннице о душах наших.

Кондак 2

Видящи святая Анастасия, яко мнози христиане страждут в темницех за имя и учение Иисус Христово, начат со усердием служити им, утешати же и целити видимаго и невидимаго вечное начало и единый конец желаний всех благочестивых: мы же, восхваляюще мудрое обучение твое от святаго мученика Хрисогона, с любовию я содействующу Богу, со благоговением поющи: Аллилуиа.

Икос 2

Разуме богомудрая Анастасия, яко вся мира всего красная тлению причастна суть, и того ради презревши светлыя одежды и утвари многоценны, тайно оболкшися во одежды нищих, вхождаше в темницы послужити исповедником Христовым; мы же мысленно споследствующе ей взываем к ней с любовию:
Радуйся, посетительнице заключенных в темницах;
Радуйся, утешительнице исповедников Христовых;
Радуйся, злато и сребро твое на них расточившая;
Радуйся, теми стяжавшая Царствие Небесное;
Радуйся, руце и нозе святых омывавшая;
Радуйся, подражательнице Христова;
Радуйся, недуги их врачевавшая;
Радуйся, телеса их честне погребавшая;
Радуйся, всеблаженная великомученице Анастасие, узников святая посетительнице и молитвеннице о душах наших.

Кондак 3

Силою укрепляема свыше, святая мученица, послужи благочестно святым и посрами ненавистника всякия добродетели диавола, наустившаго рабыню открыти деяния ея пред мужем неверным; мы же, восхваляюще благотворения твоя, Анастасие, поем вкупе с тобою: Аллилуиа.

Икос 3

Имущи великую любовь о Господе ко всем в темницах страждущим за имя Христово, ея же ради множицею биена бывши от невернаго мужа, напоследок в дому его себе темницу обрете; темже мужеству ея дивящеся, вопием к ней:
Радуйся многое озлобление за Христа приявшая;
Радуйся, терпением своим адаманту крепкому уподобившаяся;
Радуйся, заповедей Христовых усердная хранительнице;
Радуйся, словом и делом сия исполнившая;
Радуйся, всеблаженная великомученице Анастасие, узников святая посетительнице и молитвеннице о душах наших.

Кондак 4

Бурю ярости своея воздвиже на тя нечестивый мучитель муж твой, яко пленницу и рабу вмени тя, святая Анастасие; мы же, воспоминающе озлобления от него и страдания твоя, поем укреплявшему тя Господу: Аллилуиа.

Икос 4

Слыша блаженная Анастасия, яко много претерпе святый учитель ея Хрисогон за Христа, ему же и последова страданьми своми и тайно восписа ему сице: «Учителю! Чаю умрети и ничтоже ино остается, точию да испустивши дух, паду мертва». Мы же, чудящеся терпению твоему, глаголем сице:
Радуйся, непощадившая плоти своея честныя;
Радуйся, душу свою за други положити готовая;
Радуйся, богатство твое Бога ради расточившая;
Радуйся, мудро куплю деющая;
Радуйся, едино имевшая попечение о страждущих во узах;
Радуйся с усердием им служившая;
Радуйся, небоязненно входившая в темницы;
Радуйся, невозбранно вшедшая в Чертог Небесный;
Радуйся, всеблаженная великомученице Анастасие, узников святая посетительнице и молитвеннице о душах наших.

Кондак 5

Яко боготечная звезда явилася еси в римстей стране, великомученице Анастасие, посещающи страждущих за Христа в темницах и сердца их в вере утверждающи, да присно взывают с тобою Спасителю всех Богу: Аллилуиа.

Икос 5

Виде тя богоносный учитель твой Хрисогон в смущении и волнении мира сего сущу, повеле с пророком взывати тебе: вскую прискорбна еси душе моя, и вскую смущаеши мя, уповай на Бога: мы же поминающе скорбь и печаль твою яже по Бозе, зовем ти:
Радуйся, возложившая все упование твое на Господа;
Радуйся, претерпевшая тесноту Царствия ради Небеснаго;
Радуйся, чистотою твоею со Ангелы жити на Небесах сподобившаяся;
Радуйся, скорбьми твоими к Богу приблизившаяся;
Радуйся, сподобльшаяся зрети разумными очесы Господа Вседержителя;
Радуйся, молитвами твоими избавляющая нас от многих скорбей;
Радуйся, ходатайством твоим свобождающая от искушений;
Радуйся, мужеством твоим врага спасения до конца низложившая;
Радуйся, всеблаженная великомученице Анастасие, узников святая посетительнице и молитвеннице о душах наших.

Кондак 6

Проповедует весь мир христианский честныя подвиги твоя, великомученице Анастасие, и страдания твоя славит, мученическую кончину твою ублажает и поет Богу: Аллилуиа.

Икос 6

Возсияла еси паче солнца добродетельми твоими в великом граде Риме, егда исполнися предречение учителя твоего сятаго Хрисогона о погибели безбожнаго мужа твоего. Свободна бо сущи с вящшим усердием начала еси пещися о мученицех Христовых: мы же взирающе с любовию на деяния твоя, глаголем ти сице:
Радуйся, усердная помощнице страждущим;
Радуйся, наставнице трех дев: Агапии, Хионии и Ирины;
Радуйся, тех на подвиг мученичества укрепившая;
Радуйся, честные тела их на избранном месте положившая;
Радуйся, ум твой горе имевшая;
Радуйся, сердце твое жилище Святаго Духа соделавшая;
Радуйся, огнем любве к Богу всецело возгоревшая;
Радуйся, в крове крил Его небесный покров обретшая;
Радуйся, всеблаженная великомученице Анастасие, узников святая посетительнице и молитвеннице о душах наших.

Кондак 7

Хотение святаго Хрисогона, еже умрети за Христа исполнися Божиим Промыслом: егда же узрела еси честныя мощи своего учителя страстотерпца любезно их лобзающи, восплакалася еси, из глубины души износящи Богу песнь: Аллилуиа.

Икос 7

Новую благодать и силу дарова тебе Господь наш, егда восприяла еси подвиг преходити из града в град, посещающи во узах седящих. Мы последующе странствованию твоему, умильно вопием ти:
Радуйся, последовательнице стопам Христовым;
Радуйся, служительнице многим святым;
Радуйся, отрадо тяжко испытуемых;
Радуйся, надеждо ненадежных;
Радуйся, златом твоим купующая свободу верным от уз темничных;
Радуйся, Божественными словесы узы страха разрешающая;
Радуйся, молитвами твоими избавляющая нас уз греховных;
Радуйся, узорешительнице проименнованная;
Радуйся, всеблаженная великомученице Анастасие, узников святая посетительнице и молитвеннице о душах наших.

Кондак 8

Странствование твое со святою мученицею Феодотиею многим ослабу подаде: болящим дарова исцеление, многим умершим уготова погребение, живым на вящшия подвиги добродетели укрепление: нас же недостойных сподоби, святая, молитвами твоими пети разумно Богу: Аллилуиа.

Икос 8

Весь храмины темницы исполнися многим плачем и рыданиями твоими, егда рано притекши в ню по обычаю твоему, и ни единаго же обретши от узник, за имя Христово всажденных, вси бо в нощь едину повелением злочестиваго царя смерти преданы быша: мы же, воспоминающе скорбь твою о друзех Божиих, взываем тако:
Радуйся, со усердием искавшая в темницах рабов Христовых;
Радуйся, паки обретшая тех в Небесных Селениих;
Радуйся, вземшая на рамо крест Господень;
Радуйся, за любовь твою к ближним велие дерзновение к Богу стяжавшая;
Радуйся, врачевание больным ниспосылающая;
Радуйся, Божиим велением полумертвых возставляющая;
Радуйся, чистотою уневестившаяся Христу;
Радуйся, великомученице прославленная;
Радуйся, всеблаженная великомученице Анастасие, узников святая посетительнице и молитвеннице о душах наших.

Кондак 9

Нечестивии мучителие совет сотвориша, на тя, страстотерпице непобедимая, хотяще преклонити тя ко идольскому служению: ты же небоязненно взывала еси к ним: « Раба Христова есмь, и пою Ему день и нощь: Аллилуиа».

Икос 9

Витийствова с тобою начальнейший жрец идольский, хотяй лестию уловити святую душу твою: ты же, познавши всю хитрость вражию, посрамила еси мучителя и пременила вся злая во благая, безтрепетно взирающи на орудия мучительская и на вся муки: мы же, дивящеся мужеству твоему, зовем ти умилеными гласы:
Радуйся, отвергшая вся мира сего красная;
Радуйся, избравшая прияти муки за Христа;
Радуйся, с любовию на смерть идти восхотевшая;
Радуйся, и самех мучителей терпением твоим удивившая;
Радуйся, страданьми твоими Церковь Христову украсившая;
Радуйся, избравшая жизнь вечную – Христа;
Радуйся, жреца идольского посрамившая;
Радуйся, демоны ногама твоима поправшая;
Радуйся, всеблаженная великомученице Анастасие, узников святая посетительнице и молитвеннице о душах наших.

Кондак 10

Спастися всем хотящим людям споспешествуй молитвами твоими, великомученице, пред Господем и испроси разрешение грехов почитающим страдания твоя, да вопием с тобою: Аллилуиа.

Икос 10

Царя Небеснаго возлюби всем сердцем своим святая Анастасиа и в темницу ввержена бысть за сладчайшаго Иисуса, надолзе гладом и жаждею истаявающи и молитвою укрепляющеся: темже прославляюще тоя честная страдания, возсылаем к ней пение таковое:
Радуйся, последовательнице страстем Христовым;
Радуйся, украсившаяся победоносною славою;
Радуйся, земною темницею в Небесный Чертог востекшая;
Радуйся, тамо с мученики водворившаяся;
Радуйся, молитвою твоею у престола Божия воспоминающая нас;
Радуйся, узы греховныя скоро разрешающая;
Радуйся, демоны от человек прогоняющая;
Радуйся, разбойники на путь правды наставляющая;
Радуйся, всеблаженная великомученице Анастасие, узников святая посетительнице и молитвеннице о душах наших.

Кондак 11

Пение всеумиленное приносим ти, прославляюще твоя за Христа страдания и молим тя: святая страстотерпице, испроси у милостиваго Господа всем людем здравие, долгоденствие и на враги победу и одоление. Нам же, восхваляющим мучения твоя, подаждь мир и спасение, да поем Богу во веки: Аллилуиа.

Икос 11

Светлым и радостным лицем последовала еси на страдание, уготованное ти от мучителей, еже помышляюще с радостию зовем:
Радуйся, в темнице Иллирийстей гладом моримая;
Радуйся, питавшаяся надеждою своею – Христом;
Радуйся, от потопления в море Божиим смотрением избавльшеся;
Радуйся, соузников своих христовой верой просветившая;
Радуйся, меж четырех столпов протяженная;
Радуйся, уподобльшаяся Распятому на Кресте Сыну Божию;
Радуйся, жегомая огнем даже до смерти;
Радуйся, Узорешительнице, от уз плоти разрешившаяся;
Радуйся, всеблаженная великомученице Анастасие, узников святая посетительнице и молитвеннице о душах наших.

Кондак 12

Благодать свыше ниспосли всем нам, притекающим с любовию к иконе твоей: и испроси у Господа прощение согрешений наших, болящим же и страждущим исцеление, да благодарственно вси вопием дивному во святых Богу: Аллилуия.

Икос 12

Поюще подвиги твоего вольнаго мучения за Христа, покланяемся страданию твоему, великомученице досточудная, почитаем сятую кончину твою и молим тя простри твою с Небесе помощь и на нас, живущих во тьме страстей и искушений и вопиющих ти:
Радуйся, великомученице святая;
Радуйся, горлице, взлетевшая во Иерусалим Вышний;
Радуйся, непорочная невесто Христова;
Радуйся, кадильнице духовная, фимиам молитвы о нас к Богу приносящая;
Радуйся, сокровищнице исцелений неоскудная;
Радуйся, чаше даров Божиих преизобильная;
Радуйся, всех благих желаний скорая исполнительнице;
Радуйся, светлый образе жития всем чающим спасения;
Радуйся, всеблаженная великомученице Анастасие, узников святая посетительнице и молитвеннице о душах наших.

Кондак 13

О многострадальная и предивная, святая великомученице Анастасие! Нынешнее наше малое моление приими от недостойных раб твоих, с любовию приносимое тебе: и испроси нам у Христа Бога греховных уз разрешение, да избавимся молитвами твоими гнева Божия и вечнаго осуждения, и да удостоимся в Небеснем Царствии купно с тобою во веки пети Богу: Аллилуиа.
Этот кондак читается трижды, затем икос 1-й и кондак 1-й

Икос 1

Ангелом уподобилася еси разумом чистым, познавши Того, иже есть всего вопием ти:
Радуйся, возлюбившая веру Христову;
Радуйся, соблюдшая чистоту девства твоего;
Радуйся, всегда невидимо охраняемая Ангелами;
Радуйся, чистотою твоею к Богу приблизившаяся;
Радуйся, всеблаженная великомученице Анастасие, узников святая посетительнице и молитвеннице о душах наших.

Кондак 1

Избранней угоднице Христовой всеблаженней великомученице Анастасии / похвальное пение приносим, / яко имущей многое дерзновение ко Господу / еже от всяких бед, скорбей и болезней свобождати верныя, / и с любовию взываем сице: / Радуйся, всеблаженная великомученице Анастасие, // узников святая посетительнице и молитвеннице о душах наших.

МОЛИТВА
св. вмц. Анастасии Узорешительнице


О, многострадальная и премудрая великомученице Христова Анастасие! Ты душею на Небеси у престола Господня предстоиши, на земли же данною тебе благодатию, различная совершаеши исцеления.
Призри убо милостивно на предстоящия люди, и молящияся пред иконою твоею, просящия твоей помощи: простри ко Господу святые молитвы твоя о нас и испроси нам оставление согрешений наших, помощи в трудах милосердных, укрепления духа в служении, кротости, смирения и послушания; недужным исцеление, скорбящим, во узах сущим скорую помощь и заступление. Умоли Господа, да подаст всем нам христианскую кончину и добрый совет на Страшнем Суде Своем, да сподобимся и мы купно с тобою славити Отца и Сына и Святаго Духа.
Аминь.



Житие святой великомученицы Анастасии Узорешительницы
Служба святой великомученицы Анастасии Узорешительницы
Тропарь и Кондак святой великомученицы Анастасии Узорешительницы
Молитва святой великомученице Анастасии Узорешительнице

Акафист святым благоверным князем Феодору, Давиду и Константину, Смоленским и Ярославским чудотворцам
Акафист святому мученику Иоанну Воину
Акафист священномученику Иоанну (Поммеру), архиепископу Рижскому
Акафист святой преподобномученице великой княгине Елисавете